Libya tuipuiah mi 70 tlahlum : UN

United Nations Children's Fund (UNICEF) chuan Ningani khan dan loa ram danga pemlut tum, mi 70 chu Libya tuipuiah an tlahlum tih a sawi a, midang 100 vel chu chin hriat lohin an awm tih a sawi bawk.

"Central Mediterranean kana ram danga pem luh tuma an kal ṭhinna chu khawvela kawng hlauhawm ber leh thihpui tam berna a ni, he kawng hi an la zawh chhunzawm reng bawk a ni," tiin Libya-a UNICEF acting special representative chuan thuchhuah a siamah a sawi.

Thuchhuahah hian ramdang aṭanga pem lut leh raltlante ṭanpuina kawnga rawn penchhuak tur leh, mibo zawn leh chhanchhuah hna rang zawka an thawh theihna tura thuam chak an mamawh thu a sawi bawk.

Libya hi kum 2011-a an ram hruaitu hlui Muammar Gaddafi paihthlak a nih hnuah tualchhung buaina a tawk chho reng a, ram chhunga buaina an tawh reng avangin an ram aṭang hian Europe lam pem tuma Mediterranean Sea kaltlang tum hi an tam hle a,heng zinga tam tak hian kawng lakah chhiat an tawk fo a ni.

Kum 2021 thleng khan, ram danga pem tum mi 31,456 chu chhanchhuah niin, Libya ramah hian hruaikir an ni. An zingah hian naupang leh hmeichhia pawh tam tak an tel. Hetih lai hian kawng laka chhiat tawhnaah mi tam takin nunna an chan tawh bawk.