UK PM-in Krismas thilpek atan vaccine la turin mipuite ngen

Britain prime minister Boris Johnson chuan Krismas Urlawk ni thuchah a sawiah, an ramchhunga hri kai pung chho zel karah Krismas thilpek atan UK mipuite chu vaccine la vek turin a ngen

Boris Johnson chuan, "In chhungte leh rampum tana thilpek ropui tak in tih theih chu vaccine lak hi a ni a, dose khatna emaw dose hnihna emaw booster dose emaw pawh nise a ṭha vek a ni," a ti.

UK Prime Minister hian an ramin Omicron variant vangin hri kai thar record nei mah se, England-ah Krismas vuakveta khuahkhirhna khauh zawk siam chu ṭul loah a ngai a, hei ai hian kumtawp hmaa booster dose pekchhuah chu a ngai pawimawh zawk a ni.

Johnson chuan "Kum hnih chhung hri leng tawh mah se kan la paltlang thei lo a ni," tiin UK-in ni khat chhunga hri kai hmuh chhuah tam ber record an siam hnuah a sawi. Ningani khan UK-ah hian Covid-19 hri kai hmuh chhuah thar mi 1,20,000 dawn an awm a ni.

Nikum khan hri leng vangin Johnson hian December 19 khan Lonon leh England chhimchhak lam bialah pawn chhuah khapna thupek a tichhuak a ni. Mahse kuminah erawh khuahkhirhna khauh zawk hi siam a tum lo tih a lo sawi tawh a, "Ramchhung hmuntina chhungkua maktaduai chuangte'n nikkum aia Krismas nuamzawk an hman theihnan duhsakna ka hlan a ni" a ti.

PM Johnson chuan mipuite chu an chhungte, natna benvawn nei leh kum upa lamte an tlawh hmaa in test ṭhin tur leh Krismas hlim taka hmang turin duhsakna a hlan. Vaccine lak chu Isua zirtirna "nangmah i in hmangaih anga i vengte pawh i hmangaih tur a ni" tih nen a inzul hle tih a sawi bawk.