EU-in ram 15 tan ramri hawng

European Union chuan nimin aṭang khan ram 15-te tan an ramah zin luh a phal a, heng zingah hian Canada, Morocco leh Australia ramte  a tel a; US, Brazil leh Russia erawh telh an ni lo. 

Europe ram ni lo ram dang 15-te tana Europe-a zin phalna hi ni nga chhung European Council chuan a ngaihtuah a, hri leng ziaawm tawhna ram aṭanga zin luh hi an remti ta a ni. Council hian zin luh hi phal mah se, Europe member ramte chuan an duh chuan an ram bikah zin khapna hi an la siam thei tho a ni. Kar hnih dan zelah zin phalna ram hi tarlan tura ruahman a ni bawk.

Zin luh phalsak ramte hi - China, Algeria, Australia, Canada, Georgia, Japan, Montenegro, Morocco, New Zealand, Rwanda, Serbia, South Korea, Thailand, Tunisia leh Uruguay an ni a, China hi phalsak zingah tel mah se inbiakna remna an la nei lo. 

Hetih lai hian UK bakah EU state ni lo ram dang  pali  Switzerland, Iceland, Liechtenstein leh Norway-te chu him saah dah tel nghal an ni. EU member ramte chuan zin luh an phalsak chin leh an ramri an hawn hun tur hi a hranin an la puang leh hlawm dawn a ni.