South Africa Archbishop Desmond Tutu a thi

Nobel Peace Prize lo dawng tawh, South Africa Archbishop Desmond Tutu chu kum 90 mi niin nimin khan a thi.

Desmond Tutu hi kum 1997 khan prostate cancer a nei tih hriatchhuah niin hun rei tak enkawl a ni. Mipui hmuhah pawh a inlan khat hle a, a inlan hnuhnung ber chu kumin May thlaa Covid-19 vaccine a lak dawn khan a ni. Hemi ṭum hian hospital kawtah wheelchair-a thu chungin a inlan a, thu erawh a sawi lo. Archbishop Desmond Tutu IP Trust acting chairperson, Dr Ramphela Mamphele chuan nimin zing khan Cape Town-a Oasis Fracil Care Centre-ah Desmond Tutu hi thlamuang takin a kal ta tih a sawi. A thih chhan tak erawh a sawilang lo thung.

South Africa-a mingo leh mihang inthliarna nasa tak titawp tuma tharum thawhna tel loa a beih avangin kum 1984 khan Tutu hi khawvel chawimawina sang, Nobel Peace Prize pek a ni. Hei bakah hian khawvel huapa mihring dikna chanvo humhalhna kawnga a hmalak leh hnathawhte avangin chawimdawina dang pawh eng emaw zat a dawng bawk.