Australia-ah Omicron vanga thi hmasa ber awm ; Thuneitute'n inkharkhip kalpui tumna nei lo

Australia chuan Thawhṭanni khan Omicron variant thihpui hmasa ber an neih thu a puang a, mahse damdawi-ina dahluh ngai an tam loh avangin thuneitute chuan inkaihhruaina thar kalpui tumna an nei lo tih an sawi.

Omicron vanga thi hi mipa kum 80 a upa, natna dang neisa a ni. Thuneitute chuan tar enkawlna hmunah hri hi a kai thu leh, Sydney damdawi-ina enkawl a nih hnuah a thi tih an sawi.

Health expert-te chuan Omicron hi inkaichhawn awlsam zawk ni mah se strain dangte aia thawk nep zawk niin an sawi. Ram dang aṭanga hawte inkhunghran ngai tawh lo tura khuahkhirhna an siamte an thlahdul hnu lawkah hripui len hnua hri kai tam lai ber hun an thleng chho leh a ni.

Thuneitute chuan Omicron vanga thi hmasa ber hi kum upate enkawlna hmunah hri a kai thu leh Sydney dawdawi-inah a boral zui thu an puang a ni.

New South Wales, Victoria leh Queensland state-ah Thawhṭanni khan hri kai thar mi 9,107 awmin, nikhat chhunga hri kai thar tam ber ni an tawn chhoh leh ngei a rinawm ta hle a ni.

"Hri kai thar zat pung zel mah se kan damdawi-in lamah chuan nghawng a neih kan hre rih lo a ni," tiin Queensland premier Annastacia Palaszczuk chuan a sawi.

Rampawm aṭanga hunpui hmang tura khualzin lut turte tana Covid test darkar ruk dawn an ngah angaih chungchang sawizuiin, Palaszczuk chuan, "Mi zawng zawngin kan rama an rawn luh dawnin PCR test an neih ngei a ngai dawn tih an hresa vek a ni," tiin an ruahmanna siam chu a chhan a, an ram mipuite venhim chu an ngai pawimawh tih a sawi a ni.

Australia thuneitute chuan hri lengin zual lam pan zel mah se inkharkhip kalpui tuma hmalakna an la neih loh sawiin, khuahkhirhna ṭhenkhat erawh kalpui leh an tum thung a ni.