Taliban sorkarin mipa telloa hmeichhiate zinchhuah khap

Afghanistan-a rorel lai, Taliban chuan an ram hmeichhiate chu mipuite telloin km 72 aia hlaa an zinchhuah a khap.

He khapna thupek hi Pathianni khan Ministry for the Promotion of Virtue and Prevention of Vice chuan tichhuakin, motor neitute pawh hmeichhia,an taksa pum khuhna hijab inbel chauh an motor-a phur turin leh, an motor-ah pawh music play lo turin a ti. Hmeichhe journalist-te pawh TV-a an lan dawn chuan hijab inbel vek turin a ti bawk a ni.

Ministry thupuangtu Sadeq Akif Muhajir chuan hmeichhiate chu an chhung hnai mipaten an kalpui loh chuan km 72 (mel 45) aia hlaah an zin chhuah phal a ni lo tih a sawi.

Taliban-te hian thuneihna an chan hnuah hmeichhia dikna humhalh sak a, kum 1990-a khuahkhirhna khauh tak an lo siam tawh ang chu kalpui an tum lo tih sawi mah se hmeichhiate dinhmun a chep chho hle a ni. Thuneihna an chan hnuah hmeichhiate chu school kal rih lo turin an ti nghal bawk.

Pathiani vek han Taliban sorkar chuan election commission pahnih bakah, ministry for peace leh parliamentarian affairs ministry an ṭhiat bawk. Sokar thupuangtu, Bilal Karimi chuan Independent Election Commission leh Electoral Complaint Commission chu an ramin a mamawh tawh lo tih sawiin, commission-te hi din a ṭul leh a nih chuan Taliban sorkar chuan a din thar leh mai dawn a ni,a ti.