SKorea President-in US-NKorea summit nei turin a duh
South Korea president Moon Jae-in chuan November thlaa US president thlanna neih hma ngeiin US president Donald Trump leh North Korea leader Kim Jong-un te chu inbe leh se a duh tih a sawi.
European Council president Charles Michel nena nimina video conference an neihnaah Moon chuan hei hi a sawichhuak a, ram pahnih hruaitute hian nuclear programme chungchanga inbiakna an chawlhsan chu chhunzawm leh se a duh tih a sawi a ni. Hei hi US hnenah pawh a hrilh tawh a, inbiakna an chhunzawm leh theihna turin official-te pawn hma an la mek nia sawi a ni bawk.
Trump leh Kim hian kum 2018 khan Singapore-ah summit an nei a, NKorea nuclear weapon programme tihtawp tir chungchangah pawh inremna an siam beiseina a sang hman hle. Mahse summit vawi hnihna, kum 2019 kumtir Vietnam-a an neih leh chu a hlawhchham zui ta a ni. Hemi kum vek June thla khan hruaitu pahnihte hi Korea ram pahnih inrina, demilitarized zone (DMZ) ah an inhmu leh a, inbiakna chhunzawm leh remti mah se October thlaa Sweden-a working-level talk an neih chu a hlawhchham zui leh a ni.