Hri darh zel karah flight 11,500 chuang ṭhulh tawh

Europe ram leh United States lama Covid-19 hri kai pung chho zel vanga flight ṭhahnem tak chawlhtir an nih avangin Krismas chawlh hmanga zin mipui maktaduai chuangte chuan harsatna lian tak an tawk chho mek.

Kum khat chhunga zin veivak an tam hun lai, kar liam ta Zirtawpni aṭang khan khawvel pumah flight 11,500 chuang ṭhulh a ni tawh a, flight tam tak tihkhatlai a ni bawk. Airlines ṭhenkhatte chuan Omicron variant darh mek vang hian thawktu lamah indaih lohna liantak an tawh phah tih an sawi.

Flight tracker, FlightAware tarlan danin, Thawhṭanni khan flight 3,000 vel chu tihtawp an lo ni tawh a, nimin khan flight 1,100 chuang chu tihtawp an ni.

US Centers for Disease Control and Prevention chuan Thawhṭanni khan Covid-19 kai natna langchhuak lo, ni 10 chhung inkhunghrang tura thupek an siam chu, ni ngaah tihtawi a nih thu a puang. US-ah hian hri kai an pung chak leh tawh hle a, nakkum January thla hian hri kai thar tam lam record siam leh mai thei dinhmunah an ding mek. Hetih lai hian vaccine la duh lo mi ṭhahnem tak an la awm mek a ni.

President Joe Biden chuan Thawhṭanni khan US-a damdawi-in ṭhenkhatte chu an luah khah leh veka a rin thu a sawi a, hemi rual hian hri legn thar hmachhawn turin an inbuatsaih ṭhat tur sawiin mipuite chiai lo turin a chah. State governor leh top health advisor-te nena virtual meeting an neihah, Biden chuan Omicron hian Covid-19 len ṭan tirh leh kumina Delta variant anga buaina liantham a thlen a rin loh thu a sawi.

United States hi khawvela hri kai tam ber leh thihpui tam berna ram a ni mek a, kumin January thla khan nitin hri kai thar mi 2,50,000 chuangte awmin, hri pui vanga thi mi 8,16,000 chuang an awm tawh bawk a ni.

Covid hri inkaidarh awlsam tak, Omicron leng thar leh avang hian khawvel ram hrang hrangte chuan invenna atan vaccine semchhuah hna chak zawka kalpui an tum. Hri kai zinga damdawi-ina enkawl ngai leh thihpui zinga a tam zawk chu vaccine la lo an ni. Ram ṭhenkhat chuan sawiselna karah inkharkhipna an kalpui leh mek bawk.

China-in an ruahmanna siam enchhin

China chuan an rama Covid-19 hri darh mek chu khuahkhirh a, nakkum February thlaa Beijing Winter Olympics neih hmaa Covid laka fihlim hman turin hma a la mek.

Ramri-a khuahkhirhna khuah taka kalpuiin, inkhunghran hun pawha pawtsei a, a ṭul dan angin lockdown pawh puang leh mai turin a inpeih bawk. Mahse hetichung hian hri kai hi an la awm belh zel tho a ni.

Xi'an khawpuiah Thawhṭanni aṭang khan khuahkhirhna khauh tak siamin, khawpuia cheng mi maktaduai 13 vel chu inah inkhung tura tih an ni a, motor khalh chhuah pawh khap a ni bawk.