US-ah ni khatah hri kai thar nuai khat TLIN hlauthawng

Natna lam zirchiangtu, Dr Antony Fauci chuan US-a hripui leng mek chu thunun a la ni lo tih sawiin, hei vang hian hri kai hi pun belh zelin ni khatah hri kai thar mi nuai khat awm tling mah se mak a ti vak lo ang tih a sawi. 

Covid-19 leng mek chu a kai tamna leh thi tamna ber ram an ni chungin, America mipuite chuan hri laka invenna turin mask an vuah ṭha tawk lo a, social distancing dan pawh an zawm ṭha lo a ni, a ti. Thawhlehni khan US-ah hri kai thar hi mi 40,000 an chuang a, ni nga liam ta chhunga ni li chu hri kai hi mi sing li an chuang tawh a ni. Hri kai thar tam zawk hi  Florida, Arizona, Texas leh California state-a mi an ni.