Afghan hmeichhiate lungawi lohna lantir

Afghanistan khawpui, Kabul-ah hmeichhiaten Thawhlehni khan kawng zawhin, Taliban-te chu Afghan sorkar hmasa hnuaia sipai eng emaw zat a ruka tihlumah an puh.

Kabul khawpui laili laia mosque bulah hmeichhiate hi kalkhawmin, rorelna dik an phut thu an aupui a, mahse Taliban sipaiten an lo dang a ni.

Taliban-te hian hmeichhe kawngzawhte lo cover tumtu journalist-te pawh an dang bawk. Reporter ṭhenkhat manin, an hmanruate an laksak a, an camera-a thla an lakte an paihtir a ni. August thlaa Taliban-ten thuneihna an chan hnuah khan an rorel dan duh lohna lantir tawk hi an awm fo a ni.

Tun hnaiah United Nations , Amnesty International leh Human Rights Watch chuan Taliban-ten hian sorkarna an chelh hnuah sorkar hmasa hnuaia thawk 100 chuang an that tawh tih niin an sawi.

Thawhlehnia hmeichhe kawngzawhte hian Taliban-te hian khawthlang ramte thlawp, sorkar hmasa hnuaia thawkte chu ngaihdam vek an ni ang tih sawi mah se dinhmun derthawng takah an ding reng niin an sawi. Hmeichhiate dinhmun pawh a him lo hle tih an sawi bawk.

Hemi ni vek hian Kabul khawpui hmun dangah hmeichhe ṭhenkhatin lungawi lohna lantirin, hmeichhia chu lehkha zir leh hna thawh phalsak tura Taliban sorkar chu an phut a ni.