US leh Europe-ah Covid-19 kai pung zel

France chu ni hnih chhung a zawna Europe ram zinga hri kai hmuhchhuah tam berna ram niin, Covid-19 kai thar 2,08,000 an awm.

US chuan kar liamta chhung khan chawhrualin nitin hri kai thar 2,65,427 nei ziah ang an nih thu Johns Hopkins chuan a tarlang.

Denmark, Portugal, the UK leh Australia pawhin hri kai thar tam lamah record thar an siam vek bawk a ni.

Poland-ah Nilaini khan Covid-19 kaihhnawih vanga thi mi 749 an awm a, hri leng thawh lina chhunga thihpui tamber ṭum a ni. Thihpui zinga hmun lia a ṭhena hmun thumte hi vaccine la lo te an ni.

Zirchianna chuan Omicron hi ram tamtakah chuan hri leng darh chak ber a nih tawh thu leh Delta ai chuan natna a langchhuak anep deuh a, mahse inkaichhawn a awlsam zawk thung tih an sawi.

Reuters news agency tarlan danin khawvel pumah nitin hri kai thar mi maktaduai khat dawn awm ziah ang an nih thu a tarlang.

America rama top infectious disease expert Dr Anthony Fauci chuan United States-a mihring khawsa zat leh vaccine semchhuah dan rate ngaihtuahin, nakkum January thla tawp lam vel hi hri kai an tam lai ber a nih an rin thu a sawi.

Ram hausate chuan Covid vaccine thumna, booster dose semchhuah hna an kalpui ṭan a, UK-ah chuan mipui kum 12 chin chunglam zinga 57% te chuan dose thumna hi an la tawh a ni.

WHO report tarlan danin, variant zawng zawnga hri kai thar zat hi Europe-ah 57%-in a pung a, America ramah 30% in a pung bawk.