Hong Kong-ah security law duh lohna lantir

China Parliament-in a pass tak, Hong Kong security law thar siam chu duh loin nimin khan Hong Kong-ah nawrh huaihawt a ni a, police-te chuan water cannon hmangin nawrh huaihawtte hi hnawhdarh an tum a ni. 

Kum 1997-a Britain-in China kuta Hong Kong a hlanna champha puala kawngzawh buatsaihah, security law thar duh lohna hi an lantir nghal a ni. Hong Kong mipuite chuan he dan thar siam hian a zalenna laksakna turah an ngai a, nasa takin an dodal a, mahse hetichung hian Thawhlehni khan China Parliament chuan a pass ta tho a ni. 

Nimina Hong Kong-a kawngzawhte hian dan thar duh lohna lantir chhunzawm zel an tum thu leh, Hong Kong independence an phut thute an aupui a ni. Police-te chuan mipuite chu phalna nei loa pungkhawm,  hmanrua keng leh dan siam thar palzutah an puh a, an zinga 30 an man a ni. 

China leh Hong Kong thuneitute chuan security law siam thar hi  mimal zalenna leh dikna chanvo  neihte a tidanglam dawn lo a, buaina or harsatna siam ṭhinte bitumna tur zawk niin an sawi thung.