Omicron vangin kumthar lawmna titlem

Omicron coronavirus variant vangin nimina khawvel ram hrang hranga kumthar lawmna boruak chuan kum dang a pha lo hle.

France khawpui, Paris-ah chuan fireshow an neih ṭhin chu ṭhulh a ni a, London lamah pawh mipui punkhawmna siam a ni lo a, New York pawhin kum dang aiin kumthar lawmna an neih hi an tinep a ni. Times Square-an kumthar lawmna buatsaiha mi 58,000 vel an punkhawm ṭhinnaah chuan mi 15,000 chiah kalkhawm phalsak an ni.

Covid-19 hripui a len hnuah, hri laka invenna tura vaccine pek chhuah hna chak taka kalpui mek a nih avangin he hripui hi kum 2022-ah chuan thunun theih beisei a ni hman a, mahse Omicron variant darh thar leh avangin ram hrang hrangah hri kai pung tharin, an buai chho leh mek a ni.

Kar liam ta chhung khan khawvel pumah hri kai thar lamah record siam a ni leh a, December 24-30 inkar khan nitin hri kai thar mi maktaduai khat chuang chhinchhiah ziah ang a nih thu Reuters data chuan a tarlang. Hri vanga thi erawh pung loin, hei hian variant thar hi variant dangte aiin a thawk nep tawh zawk anih rinna a lian hle.

New York khawpui-ah Nilaini leh Ningani khan hri kai mi 44,000 leh 43,000 an awm a, hei vang hian kumthar lawmna hun hman hi kaltlangpui loh mai duhtu an awm a ni. Mahse official-te chuan vaccine dose kima la tawhte chu mask vuah leh, social distancing dan zawm chunga pawn lama kumthar lawmna hun an hman hi an phalsak a ni.

Ram tam takah pawh kumthar lawmna hi ṭhulh leh tihtlem a ni a, kumtina halmawi nasa taka an hal ṭhinna, Kuala Lumpur-a Petronas Towers-ah kumthar lawmna hi ṭhulh a ni. Paris khawpuiah pawh Champs-Elyses-a kumthar lawmna hun hman ṭhin chu mipui punkhawm a him loa an ngaih avangin ṭhulh a ni bawk.

Netherlands-ah chuan kumthar lawm tur hian pawn lamah mi pali aia tam awmkhawm khap a ni a, Amsterdam-a central Dam Square-a mipui pungkhawmte pawh police-te chuan an hnawtdarh a ni.

London chuan nikum October thla khan halmawi leh light show neih lo khap tawh mah se official te chuan mipuite en theih turin TV kaltlangin an tichhuak a, kum 2017 hnua a vawi khatnan kumthar lawmnan Big Ben sana chu tihrik a ni bawk.

Omicron variant a darh thu puang hmasa ber tu, South Africa-ah chuan hri vanga thi an pun loh avangin kumthar hmain zan lam curfew a lo puan tawh chu a hlip thung.

Madrid khuaa Puerta del Sol square-a kumthar lawm tura kalte chuan security checkpoint ṭhahnem tak an paltlang a ngai a, mask vuah chung leh seating capacity a leng zat 60% te nen kumthar lawmna hun an hmang.

Asia-a hmun tam zawkah chuan kumthar lawmna hun hi tihtawi emaw ṭhulh emaw an ni. South Korea chuan kum hnih chhung a zawnin zanlaia an neih ṭhin bell-ringing ceremony chu an ṭhulh a, Japan chuan Shibuya entertainment district-ah intih hlimna lam hawi khapna an tichhuak a, prime minister Fumio Kishida chuan Youtube kaltlangin mipuite chu mask vuah tur leh punkhawmna hmunah tel tam lo turin a chah.

Kum 2019 tawp lama coronavirus rawn inṭanna China chuan, fimkhur takin hunpui chhungin khuahkhirhna an kalpui a, Xi'an khawpuiah inkharkhip an kalpui bakah khawpui tam takah chuan kumthar lawmna hun hi an ṭhulh bawk a ni.