Europe-ah Covid-19 kai mtd 100 chuang awm tawh

Europe khawmualpuiah Covid-19 hri len tirh aṭangin coronavirus kai mi maktaduai 100 chuang an awm tawh a, hei hi khawvel puma hri kai tawh zat hmun thuma ṭhena hmun khat ai pawhin an tam zawk tih AFP data chuan a tarlang.

Europe region-a ram leh territory 52-ah hian kum hnih chhungin Covid-19 hri kai mi 100,074,753 an awm tawh a ni.

Europe rama hri kai zinga mi maktaduai 4.9 te chu ni sarih liamta chhunga hmuhchhuah an ni a, ram/ territory 52 zinga a 17 te chuan kar khat chhungin hri kai tam lamah record thar an siam hlawm a ni.

France-ah chuan kar liam ta chhung khan hri kai thar mi maktaduai khat chuang an awm a, hripui len ṭan tirh aṭanga an rama positive case 10% a tling phak.

Mi maktaduai khat zela hri kai awm zat sanna ramte chu Europe ram vek an ni. Denmark-ah chuan mi maktaduai khatah 2,045 zelin hri hi an kai a, Cyprus-ah mi 1,969 leh Ireland-ah mi 1,964 an awm bawk.

Kar liam ta chhung Europe-ah chawhrualin ni khatah hri vangin mi 3,413 zel thi ang an ni a, a kar hmasa aiin 7% in an tlahniam a ni. Thihpui an tam lai ber, nikum January thla khan chawhrualin nitin hri vanga thi mi 5,735 an awm ziah a ni.

Europe mi 65% velte chuan vaccine dose khatna an la tawh a, 65% in dose kimin an la tawh bawk.

World Health Organization chuan Covid-19 kaihhnawih avanga thi zat thlirin, khawvel pumah hri vanga thihna chu a let hnih aṭanga a let thum thlengin a la pung chho leh thei tih an sawi.