Khawvelah Covid-19 hri kai thar an pung zel

Johns Hopkins University-in a tarlan danin nimin thleng khan khawvela Covid-19 hri kai mi maktaduai 52 chuang an awm tawh a, heng zinga 12,87,051 chuan an thihpui tawh a ni. 

Ram hrang hrangah hri kai thar an pun belh zel bakah, damdawi-ina dah luh an tam belh zel. Mithiamte chuan hri hian a hnathawh dan a thlak chho zel bawk niin an sawi. 

US-a state lian California-ah chuan Covid-19 hri kai hi Ningani khan maktaduai khat an tling tawh a, he state-a hri kai tawh zat hi mi 10,00,631 an ni a, mi 18,126 in an thihpui tawh. Nilaini khan Texas chu US state zinga Covid-19 hri kai mtd khat tling hmasa ber a lo ni tawh a ni.

Bangladesh-ah Covid-19 hri leng thawh hnihna a thlen chhoh mek avangin December 19 thleng zirna in khar a ni dawn. 

Kumin March 17 aṭang khan Bangladesh sorkar chuan an rama Covid-19 hri leng vangin school leh educational institution-te chu a khar tir. Zirna inte hi vawi tam tak khar hun chhung pawhsei a nih hnuah November 15 aṭangin sorkar chuan hawn chhoh a tum a, mahse an ramah hri leng thawh hnihna a rawn inṭan chho dawna an hriat vangin leh thlasik a rawn inher chhoh ṭan avangin December 19 thleng zirna in zawng zawngte chu khar a nih tur thu sorkar thuchhuah chuan a tarlang. 

Covid-19 hri kai damdawi-ina enkawl ngai an tam chhoh zel avangin Greece-a damdawi-ina thawkte chuan hnathawktu an mamawh belh thu sorkarah an thleng.

Ningani khan Greece ramah Covid-19 hri kai thar chu mi 3,300 chuang an awm, heng mite nen hian hri kai tawh zawng zawng hi mi 66,637 an ni tawh a ni. Hei vang hian sorkar chuan Nilaini khan Zirtawpni (nimin) aṭanga hman tur rampum huapin curfew a puang a ni.

Greece-ah hian intensive care unit (ICU) khum 1,104 a awm a, heng zinga khum 496 chu Covid-19 hri kai te enkawlna tura tih a ni a, enkawlna tura ruahman aṭanga khum 335-ah chuan hri kaina zualte enkawl mek an ni.

France president Emma­nuel Macron chuan October 28 khan December 1 thleng awh tur lockdown a puang a, mahse hri chuan ziaawm lam a pan mai loh avangin prime minister Jean Castex chuan inkhuahkhirhna thar hman a ngai dawn niin a sawi.

Castex chuan an rama Covid-19 hri leng chuan zia­awm lam a pan mai loh chuan inkuahkhirhna thar hman a ngai dawn thu a sawi a, an boruak a zirin Krismas-ah chuan inkhuahkhirhna te hlip tum a nih thu pawh a sawi bawk. 

Germany health minister Jens Spahn chuan an rama Covid-19 hri lengin zual lam a la pan zel avangin, lockdown an hmang mek chu nakkum January thla thleng pawhsei a ngaih mai theih thu a sawi.

Ningani khan Covid-19 hri kai thar mi 21,866 an awm a, anni nen hian Germany-a hri kai tawh zawng zawng hi mi 7,27,553 an ni. Ningani vek khan he hri thihpui hi mi 215 awmin, he hripui thihpui hi mi 11,982 an awm tawh. 

UK sorkar chuan an rama Covid-19 hri kai thawh hnihna a thlen mek avangin, inkhuahkhirhna thar leh test runpui a nei chho mek a, hetih lai mek hian Ningania hri kai thar chu mi 33,470 an awm a, hei hi sorkarin inkhuahkhirhna a tihchhuah hnua ni khata hri kai tam ber ni a ni.