Sudan Prime Minister Hamdok a bang

Sudan prime minister Abdalla Hamdok chu Pathianni khan a bang.

Sudan ramah hian sipaiten thla hnih chuang liam ta, kum 2021 October 25 khan PM Hamdok kaihhruai sorkar hi an paihthla a ni. Mahse November 21 khan general Abdel Fatta al-Burhan kaihhruai sipai sorkar chuan civil mite nena sorkar siam dun turin Hamdok hi PM atan an dah leh a ni. Hetih lai hian ram chhunga sipaite rorelna duh lohna hi lantir chhunzawm a la ni reng bawk.

Inremna an siamah Hamdok hi inthlan buatsaih a nih hma chu technoccrat cabinet ho tura tih a ni a, mahse eng ang takin ngen thuneihna hi pek an ni tih erawh hriat chian a ni lo. Mipuite pawh sipaite hi an ring zo lo tih an sawi bawk a ni. Hetih lai hian sipai hotu, general al-Burhan chuan civil sorkar paihthlak a nihna chhan chu an rama civil war thleng mai tur venna atana ti a nih thu a sawi a, ruahmanna an siam lawk tawh angin kum 2023 July thlaah inthlan buatsaih tum a ni tih a sawi.

Hamdok chuan Pathian­ni zana TV kal­tlanga ram mipuite hnena thuchah a sawiah PM aṭanga a ban thu hi a puang a, "Kan ramin dinhmun chhe tak a tawh tur dan tumin theihtawp ka chhuah ve a ni,' a ti. Sipai leh civil mite inkara inremna siam tuma hma an lakna chu awmzia a neih theih loh avangin midangten hma an lak ve theihna turin a kian tih a sawi.

Pathianni khan an ram khawpui, Khar­toum leh Omudrman khawpui­­ah civil sorkar din phutin mi tam takin lungawi lohna an lantir leh a, pungkhawmte hnawhdarh nan hian sipaite hian tear gas-te an hmang a ni. Democracy thlawptu pawl, Doctors' Committee chuan security force-te hian nawrh huaihawt zinga pathum an that tih an sawi a, an zingah pakhat chu a awmah (chest) silaia kah niin, midangte chuan an luah hliam na tak an tuar a, an hliam tuar loin an boral zui ve leh tih an sawi. Pathiannia thite nen hian sipaiten thuneihna an chan hnua lungawi lohna lantir zinga mi 57 chu sipaite kut tuar hian an thi tawh a, mi za telin hliam an tuar tawh bawk.

Hamdok-a'n a ban thu a puan hnuah, US chuan Sudan ram hruaitute hnenah chuan an inngeih lohna hrang hrangte dah ṭha a, civil sorkar a din leh theihna tura hma la a, inremna siam turin a nawr.