Israel-in Gaza-a Hamas ho hmun kap
Israel sipaite chuan Inrinni zan khan Gaza Strip-a Hamas ho rocket siamna hmun leh military post an kap.
Gaza Strip aṭanga rocket hmanga Israel beih a nih leh avangin Israel sipaite hian airstrike hmangin an chhang let nghal a ni. Israel sipaite chuan Inrinnni zana kum 2022 kumthar lawmna hman laiin, Gaza aṭang hian Palestinian firfiakte chuan Israel lamah rocket eng emaw zat an kap tih an sawi.
Hamas ho beihna chhang leta Israel sipaiten Gaza Strip an beihnaah hian Hamas ho hmun pawimawh bakah, thlai chinna ramte pawh an bei tel niin Hamas thupuangtu Hazem Qassem chuan a sawi a, mahse mihring thi leh hliam erawh an awm thu report a awm lo. Qassem chuan Palestinian ram leh mipuite veng turin an bei zel dawn tih a sawi a, Israel-in an ram a luahsak chu an dodal zel tur thu a sawi.
Israel prime minister Naftalli Bennet chuan Hamas firfiak pawl chu vauin, Israel dawhtheihnain a tlin tawh bik lo tih sawiin an ram leh Isreal mipuite beihna chu na taka an chhanlet zel tur thu a sawi.