August 11-ah Pakistan PM atan Imran Khan lalut dawn

Pakistan Tehreek-i-Insaf (PTI) party hruaitu, Imran Khan chu August 11 hian Pakistan Prime Minister thar atan lakluh a ni dawn.

July 25-a Pakistan ram inthlanpui neihah PTI hi party mala seat la hnem ber a ni a, mahse party mala sorkarna an siam phak loh avangin party tenau zawk leh independent member-te thawhpui turin a be mek a ni.

Kum 65 mi Imran Khan chuan nimina Khyber Pakhtunkhwa province-a PTI member-te hmaa thu a sawihah, August 11-ah PM atana lakluh a nih tur thu hi a sawi a, Khyber Pakhtunkhwa chief minister tur pawh darkar 48 chhunga a ruat fel tur thu a sawi. Imran Khan chuan an ram mipuite tana ṭha tur ang bera thutlukna a siam zel tur thu a sawi bawk. A kaihhruai sorkar chuan retheihna umbo chu a ngaihpawimawh ber tur zingah a tel a tih a sawi.

Election Commission of Pakistan (ECP) in inthlan result a tihchhuahah, PTI chuan Parliament lower house, National Assembly-ah general seat 116 a la a, sorkarna siam tur hian seat 137 neih phak a ngai a ni. Hetih lai hian rorellai party PML-N chuan seat 64 lain, prime minister hlui Benazir Bhutto-i party PPP chuan seat 43 a la ni.

PTI chuan sorkar siam tur hian Muttahida Qaumi Movement-Pakistan (MQM-P), the Grand Democratic Alliance (GDA), PML-Quaid (PML-Q), leh Balochistan Awami Party (BAP) leh indepenent member-te a be mek a ni.

Hetih lai hian inthlan neih laiin Imran Khan-an code of conduct a palzut nia puh chungchanga ECP chuan PTI hotu hi insawifiah turin a hriattir. Khan hian vote a thlaknaah voting screen hnung lamah midang hmuh theih loh tura vote thlak loin, a ballot paper hi mipuite hmuh theih turin dawhkan chungah a chhu a, hei hi TV camera te pawhin an lo la a ni. A thiltih hi NA-53 constituency-a president officer leh polling staff-te pawhin an lo khap lo nia sawi a ni bawk.

Election Act section 185 hnuaiah vote thlak laia a ruka thlak loa, midangte hmuh theih tura tilangte chu thla ruk lung-in tan tir leh Rs 1,000 chawitir theih an ni.