Trump-an Iran President Rouhani hmuh a inpeih

US President Donald Trump chuan Iran President Hassan Rouhani chu thu delhkilh awm loa inhmuh a duh a nih chuan meeting neihpui tura a inpeih thu a sawi.

White House-a reporter-te a kawmnaah President Trump chuan meeting chu thil pawimawh leh ṭangkai tak nia a ngaih thu sawiin, tupawh meeting neihpui a hreh loh thu a sawi.

May thla khan Iran leh world power ram paruk-ten kum 2015-a Iran nuclear deal an lo siam tawh aṭangin US hi a inhnuhdawk a, he inremna siam hi a ṭha tawk loin a huam zau tawk lo niin a sawi. Nuclear deal aṭanga a inhnuhdawh hnuah US chuan Iran ram hrekna thar siam leh a tum mek a, hei hi Iran inremna siampuitu UK, France, China, Russai leh Germany-te chuan an duh lo hle.

President Trump-an meeting neihpui tura a inpeih thu a sawi hi Iran President Rouhani adviser Hamid Aboutalebi chuan chhangin, inbiak neihna tur kawng hawng tur hian Trump chuan nuclear deal a thlawp a, Iran mite dikna chanvo neihte a zahsak a ngai a ni, a ti.

Trump leh Rouhani te hian meeeting hi an nei thei a nih chuan, kum 1979-a Iran revolution hnua ram pahnih hruaituten meeting an neih hmasa ber tur a ni ang.