Mt Rinjani-a tangkhang hiker 543-te hruaichhuak

Indonesia-a Lombok thliarkara lirnghing vanga Rinjani tlanga tlawn, hiker 543 tangkhangte chu nimin khan him taka hruaichhuah an ni.

Pathianni khan Lombok-ah hian magnitude 6.4-a nain lir a nghing a, lirnghing vanga leimin nasa tak thlengin, Mount Rinjani kalpawhna kawngte a hnawh vek a ni. Lirnghingin chhiatna a thlengah hian mi 16 an thi a, mi dang 330 chuangin hliam an tuar.

Mount Rinjani kal pawhna kawngte a chhiat avangin he tlanga lawn, mi 543 zet chu an tangkhang a, heng mite chhanchhuah hna hi thawh nghal niin nimin khan him taka hruaichhuah an ni. Tlang-a tangkhang hiker tam zawk chuan Thawhṭanni zan khan tlang bulṭhut chu kein an pan a, ṭhenkhat erawh chu helicopter hmanga hruaichhuah an ni.

Search and rescue agency thupuangtu Gusti Lanang Wiswananda chuan hiker-te hi an chau hlawm hle a, mahse an hriselna dinhmun erawh a ṭha niin a sawi.

Lirnghing vang hian Lombok-a cheng mi tam takin an chenna in an chan a, heng mite hi an awm lailawkna tur relief camp siamah an la khawsa mek a ni.