NKorea-in missile thar siam leh mek : US official

North Korea chuan ballistic missile thar a siam leh mek niin US official-ten an sawi a, mahse eng chen nge an thawh tawh erawh an la hriatchian loh thu an sawi.

US official te chuan Washington Post hnenah spy satellite aṭangin NKorea hian ballistic missile a siamna hmunah hna a thawk leh mek tih hmuh a nih tih an hrilh.

Kumin June thlaa Singapore-a US President Donald Trump leh North Korea hotu Kim Jong-un te inhmuh ṭum khan nuclear ralthuam tibo tura thawhdun an lo remti tawh a, Trump pawhin NKorea chuan nuclear ralthuam lamah US tana hlauhawm a nih tawh lo tihte pawh a sawi a ni.

Thawhṭanni khan Washington Post chuan NKorea hian an ram khawpui, Pyongyang bula Sanumdong facility-ah liquid-fuelled intercontinental ballistic missiles (ICBMs) pahnih thar a siam mek nia a lan thu a tarlang. He factory hi NKorea-in US kap pha tur ICBM a siam hmasak ber, Hwasong-15 a siamchhuahna hmun kha a ni.

North Korea hian kum hnih kalta aṭanga nuclear programme lama

ṭan lain, ṭum ruk zet nuclear test a nei tawh a, a hnuhnung ber chu nikum September thla khan a ni. Nuclear test a neih ṭhin avang hian ram hrang hrangte hrekna pawh an siam phah a ni. Mahse June thlaa President Trump nena meeting an neih ṭum khan Kim chuan Korean Peninsula aṭanga nuclear ralthuam tihbona tura hmalak a lo remti tawh a, ram pahnihte inkara boruak ṭha siam tura theihtawp chhuah pawh an remti bawk.