Booster-in Omicron lakah 88% in hna thawk

United Kingdom Health Security Agency (UKSHA) in report a tihchhuahah, Covid-19 dose thumna, booster dose chuan khawvela hri darh thar leh mek, Omicron lakah 88% in hna a thawk tih an sawi.

Report-ah hian booster dose hian Omicron variant kai pawh damdawi-in luhpui ngai tura an la na tur a veng tih an tarlang. He report hi zirchianna pahnih aṭanga an siam a ni. Omicron leh Delta variant kaite dinhmun te, vaccine an lak leh lak loh te, dawmdawi-inah dahluh ngai zatte an zirchiang a ni. Hemi rual hian booster dose-in damdawi-in dah luh ngai tur tam takin veng mah se, Omicron kai hi an pun zel avangin damdawi-in luhpui ngai pawh an la pun ve zel theih tho thu a tarlang bawk a ni.

US-a Scripps Research Translational Institute-a molecular medicine professor, Eric Topol chuan vaccine dose hnihna lak aṭanga thla ruk velah vaccine hnathawh hi 52% velaha tlahniam a, hemi hnua booster dose lak leh hian taksaa natna dotu tichar thar lehin, Covid-19 kai pawh damdawi-in panpui ngai tur nasa takin a tihhniam phah a ni, a ti.

Omicron variant darh leh avanga ram tam takin vaccine dose thumna, booster dose an pek ṭan leh mek laiin, Israel erawh chuan khawvel ram zinga a hmasa ber turin dose lina a pechhuak tawh dawn thung.

Israel prime minister Naftali Bennett chuan vaccine dose lina hi medical staff te bakah kum 60 chunglamte hnenah pek a ni dawn tih sawiin, dose thumna lak aṭanga thla li tling tawhten an la thei ang tih a sawi. Booster dose an pek belh leh tur hian Israel mite chu hri lakah venhimna thuah thar a pe leh dawn a ni,a ti. An ramah Omicron a darh mek avangin vaccine dose lina la thei, kum upa zawkte chu la vek turin a ngen bawk.

France-ah Covid-19 variant thar 'IHU' hmuchhuak
France rama mithiamte leh scientist te chuan Covid-19 variant thar 'IHU' tih chu an hmuchhuak thar. He variant thar hi Omicron aiin a insiam danglam (mutate) nasa zawk tih an sawi.

Marseilles hnaihah variant thar kai mi 12 dawn an hmuchhuak tawh a, hri kai te hi Africa ram pakhat, Cameroon nen inkungkaihna nei niin mithiamte chuan an sawi.

B.1.640.2 emaw IHU variant emaw hi IHU Mediterranee Infection academics te chuan an hmuchhuak a, he hri hi vawi 46 a insiam danglam a, Omicron ai pawhin a inthlak danglam nasa zawk tih an sawi a ni.