Iran-in Taliban kaihhruai sorkar la pawm duh lo

Iran sorkar chuan Afghanistan-a Taliban kaihhruai sorkar chuan a huang a zauh phawt loh chuan a pawm dawn lo tih a sawi.

Hemi rual hian Taliban-te chuan sorkar huam zau zawk a siam thei a nih chuan an pawm dawn a, ram dangte pawh pawm turin an nawr zawk tih Iran ambassador Bahadur Aminian chuan Kabul-a Tolo News-in a kawmnaah a sawi a ni.

Aminian chuan, "Pawl bil pakhatin sorkarna an siam a, pawl dang aiawhte an telh ve loh chuan kan pawm thei lo a ni. Ram hrang hrangte chuan an ram ṭhatna turin sorkar siam dan tur a nei vek a, anni pawhin Afghan ram duhdan leh ṭhatna turin sorkar huamzau tak an siam a ngai a ni," a ti.

Ram hrang hrangte chuan Taliban-te hi sorkar huamzau zawk siam tur leh, hmeichhiate dikna chanvote humhalh sak turin an lo nawr fo tawh a ni. Tun thlengin eng ram mahin Taliban sorkar hi an la pawm sak lo.