SKorea Preident-in NKorea nena inremna siam turin theihtawp chhuah a tiam

South Korea president Moon Jae-in chuan President term a la neih chhung chu North Korea nena inremna an siam theihnan theihtawp chhuah chhunzawm zel a tiam.

President Moon term hi kumin May thla hian a tawp tawh dawn a ni.

"Ka hun tawp thlengin inremna tluantling kan siam theih nan theihtawp ka chhuah zel dawn a ni," tiin ram pahnihten inbiakna an neih theihna tura hma lak zel a tiam. A term a zawh hnua sorkar thar pawhin hei hi an chhunzawm zel a beisei thu a sawi nghal bawk.

Moon leh NKorea hotu Kim Jong-un te hian ṭum eng emaw zat summit an lo nei tawh a, mahse North Korea nuclear weapon programme titawp tura phut chungchangah an ngaihdan a inmil thei lo a ni.

Hetih lai hian Kumhlui thlah nia North Korea hruaitu Kim-a'n thu a sawiah khan President Moon-a'n 1950-1953 Korean War tawpna official-a puan a rawtna leh US nena a inbiakna chhunzawm leh tura a ngen chungchang erawh engmah a sawilang tel lo a ni. Korean War hi tawp tawh mah se, tun thlengin official-in he indona a tawpna thu hi engmah siam a la ni lo.