Pastor Brunson vangin US-in Turkey minister-te hrekna siam

US chuan Turkey rama tang mek, Pastoer Andrew Brunson chhuah tura a ngenna tihhhlawhtlin a nih loh vangin Turkey minister pahnih, Justice Minister Abdulhamit Gul leh Interior Minister Suleyman Soylu te hrekna tur a siam.

Protestant kohhran pastor, Andrew Brunson hi enthlatu leh Turkey sorkar paihthlak tuma beitute nena inzawmna neia puhin kum 2016 October thla khan man a ni a, kum hnih dawn jail-ah tantir a nih hnuin kar hmasa khan a hriselna ṭhat tawk loh vangin house arrest-ah dah a ni. Thubuai siamsakah hian thiam loh chantir a nih chuan kum 35 thleng lung-in tantir theih a ni ang.

US chuan Pastor Brunson hi chhuah turin Turkey thuneitute chu a lo ngen tawh a, White House thupuangtu Sarah Sanders-i chuan Pastor Brunson-an thil dik lo a ti tih finfiahna engmah an hmuh loh thu sawiin, Turkey sorkar rorelna dik lo tuartu a nih thu a sawi. Turkey sorkarin an ngenna a tihhhlawtlin loh avangin President Donald Trump-a thupek angin Treasury chuan Turkey minister of justice leh minister of interior-te hrekna hi siam a ni ta tih a sawi a, heng minister pahnihte hi Pastor Brunson-a man leh tantir a nihna kawngah pawn an inrawlh nasa hle niin a sawi.

US-in hrekna a siam hmang hian minister pahnihten US-a an thil neihte chu khawih chet theih loha dah a ni a, US khua leh tuite chu sumdawnna lamah pawh minister pahnihte hi thawhpui khap an ni bawk.

US Secretary of State Mike Pompeo chuan kar leh hian Turkey Foreign Affairs minister Mevlut Cavusoglu chu hmuin, Brunson chhuah zalen tur hian a ngen leh dawn tih State Department chuan a sawi.