US Congress-in Pakistan security chhawmdawlna pek tur tihniam

US Congress chuan National Defense Authorisation Act-2019 (NDAA-19) chu pass in, Pakistan hnena security lam chhawmdawlna tur suma pek ṭhin chu nasa takin a tihniam.

US-in Pakistan tana security kaihhnawiha chhawmdawlna a pek chu US dollar maktaduai 150-ah tihhniam a ni. Hei hi a hma lama a lo pek ṭhin, kum khata dollar maktaduai 750 leh dollar tluklehdingawn khat inkar nen chuan a inthlau tawh hle a ni. Nikum khan Coalition Support Fund (CSF) kaltlangin chhawmdawlna hi dollar maktaduai 700 a pe a ni.

Senate chuan Nilaini khan NDAA-19 conference report hi vote 87-10 hmangin a pass a, kar hmasa khan House of Representative chuan a lo pass tawh bawk. Senate-in a pawm ve leh tak avangin President Donald Trump-a pawmpuina la turin White House-ah thawn a ni tawh dawn a ni.

Pakistan ṭanpuina tur sum tihtlem a nih rualin Pakistan ram laka an thilphut ṭhenkhat pawh tihtawp a ni nghal bawk a, heng zingah hian Naqqahni Network laka action la tura phut theihna tur a nei tawh dawn lo a ni. White House chuan Pakistan chu Coalition Support Funds (CSF) dawng thei lo tura dah a nih rual hian, border security tihchangtlunna tura puihna dawng thei ram list-ah telh a ni thung tih a sawi.