Myanmar-ah Suu Kyi party-in sorkar siam leh dawn

Myanmar ram hruaitu Aung San Suu Kyi party,  National League for Demo­cracy (NLD) chuan Pathian­nia an ram inthlanpui neih takah hnehna changin, sorkar an siam leh dawn tih a sawi. 

Union Election Com­mission (UEC) in inthlan result a tihchhuah tawh chinah, NLD hian Parliament in hnih,  House of Representatives (Lower House) leh House of Nationalities (Upper House)-ah seat 346 a la tawh a, sorkarna siam tura seat neih ngai, seat 322 chu a pel tawh a ni. 

NLD hian Lower House-a seat 225 lain, Upper House-ah seat 121 a la a, Regional/State Parliament-ah seat 434 a la bawk.

Eptu pawl, sipai thlawp Union Solidarity and Development Party (USDP)  chuan Parliament-ah seat 58 lain, Regional/State Parliament-ah seat 33 a la a ni. USDP chuan UEC-in inthlan result a puan chu an pawm lo tih sawiin, inthlan felfai leh dik a awmna turin vote thlak ṭhat an phut. Hetih lai hian inthlanpui neihpuitu, international leh local observer-te chuan inthlanpui hi tluang taka neih a nih thu leh, thil dik lo liam tham engmah a awm loh thu an sawi thung. 

President ṭang lai, U Min Wying leh State Counsellor Aung San Suu Kyi-te chu House of Representative member atan thlan tlin leh an ni a, vice president Henry Van Thio chu House of Nationalities  member atan thlan tlin a ni bawk. 

Inthlanpui hi Parliament level pathuma seat 1,117 awm aṭangin seat 953-ah neih a ni a, seat 64 result erawh puan a la ni lo. Inthlan hi Bago region, Kachin, Kayin, Mon, Rakhine, Shan leh Chin state huam chhunga township 15 leh village tract 665-ah security lam thil avangin  neih a ni lo thung. President Office thupuangtu, Zaw Htay chuan heng hmuna inthlan buatsaih a nih theihna atan inbiakna neih a ni dawn tih a sawi. 

NLD chuan ṭangrual sor­kar siam turin tualṭo party hrang hrangte hnenah sawm­na a thawn a, an party chuan ram mipuite inpumkhatna leh remna leh muanna a awm chhunzawm theihna turin theihtawp a chhuah zel dawn tih party secretary Monya Aung chuan a sawi a ni.