Zimbabwe President thlanah Emmerson Mnangagwa a chak

Zimbabwe ram president inthlan neih zawh takah President ṭanglai Emmerson Mnangagwa chu thlan tlin a ni.

Electoral commission-in inthlan result a tihchhuahah Zanu-PF party candidate Emmerson Mnangagwa chuan vote tla aṭangin 50.8% a hmu a, eptu pawl MDC Alliance candidate Nelson Chamisa chuan 44.3% a hmu. Mnangagwa hian president tling tura vote hmuh ngai zat, vote tla aṭanga 50% a hmuh phak avangin inthlan thawh hnihna neih a ngai dawn ta lo a ni.

Eptute chuan result hi an pawm lo tih sawiin electoral commission office bulah an pungkhawm a, police-ten an hnawtdarh a ni.

President Mnangagwa chuan president atana thlan tlin a ni chu lawmawm a tih thu sawiin, an ram tan bul ṭan tharna tur a nih thu a sawi. Mnangagwa hi nikum November thlaa sipai puihna hmanga Zimbabwe president aṭanga Robert Mugabe paihthlak a nih hnu khan president dinhmun hi a chelh zui a ni.

Hetihlai hian eptu pawl candidate Chamisa chuan inthlanah hian hnehtu a nih thu Ningani khan a lo sawi tawh a, Zanu-PF chuan inthlan result tihchingpen an tum a, hei hi an remti dawn lo tih a sawi. Mahse Zimbabwe Electoral Commission (Zec) chuan thil dik lo engmah a awm lo niin a sawi thung.

Zimbabwe Parliament inthlan result pawh kar tir khan tihchuah niin, Zanu-PF hian seat 144 a la a, party pasarih thawkho MDC Alliance han seat 64 la in, Mugabe-a thlawptuten party an din thar National Patriotic Front chuan seat khat a la bawk.