Trump-an NKorea hotu lawmthu hrilh

US President Donald Trump chuan kum 1950-1953 Korean War laia US sipai thite ruhro lak a phalsak avangin North Korea ram hotu lu ber Kim Jong-un chu lawmthu a hrilh a, meeting an neih leh theih hun pawh a nghakhlel hle tih a sawi.

President Trump chuan a twitter-ah Chairman Kim Jong-un chu a thutiamte hlen a, US in a ngaihhlut tak a sipai thite ruhro a thawn kir sak avangin a lawm hle tih a sawi a, Kim-an lehkha lawmawm tak a thawn avanga a lawmthu leh, inhmuh leh thuai a nghahhlelh thu a tarlang a ni.

Kim hian July thla laihawl vel khan President Trump hi lehkha a thawn a, hetah hian President Trump nena meeting an neih leh theih a beisei thute a ziak a ni.

Korean War laia US sipai thite ruhro dahna, bawm 55 chu US hnenah hlan niin Nilaini khan US thlenpui an ni a, an puala inkhawm buatsaih a ni. Korean War lai hian US sipai 7,700 chaung chu an chin hriat lohin an awm a, heng zinga 5,300 chu tuna North Korea ram ni taah hian an bo a ni. United Kingdom, Australia leh Canada sipai eng emaw pawh chin hriat lohin an awm bawk a ni.