Pakistan eptuten PM candidate siam dawn

Pakistan rama eptute party-te chuan July 25-a inthlanpui an neiha party mala seat la hnem ber, Pakistan Tehrik-i-Insaf (PTI) party hotu Imran Khan-a khing turin prime minister candidate siam an tum.

PTI hi party mala seat la hnam ber ni mah se sorkarna siam tura seat mamawh zat a nei pha lo a, party tenau zawk leh independent member-te thawhpui tumin a be mek a ni.

Parliament Lower House, National Assembly-ah tun thla tawp lam hian prime minister thar hi thlan a ni ang. Hetih lai hian PTI hi seat ngah ber an nih vangin an party hotu Imran Khan chu tling chiang saa ngaih a ni. PTI chuan August 11-ah PM thar atan lakluh a nih tur thu pawh a lo puang lawk a, security agency lam pawhin PM official residence-a insawn tawh turin an lo ngen tawh bawk a ni.

Mahse eptu party-te chuan National Assembly-a speaker leh deputy speaker tur bakah prime minister candidate hi an siam dawn tih an sawi. PML-N leader Ahsan Iqbal chuan PM candidate tan hian PML-N president Shehbaz Sharif an ruat dawn tih a sawi.

Hetih lai hian PTI chuan August 11-a PM atana Imran Khan lakluh chu a mawlmang thei anga bera kalpui an tum thu leh, ramdang palaite pawh sawm an nih loh tur thu an sawi leh. PTI thupuangtu Fawad Chaudhry chuan Foreign Office thurawn angin ramdang palaite sawm tumna chu sut leh a nih thu a sawi a, Imran Khan hian PM lakluh inkhawm hi sum sen tam lo thei ang bera kalpui turin a ti a ni, a ti. PM lakluh inkhawm hi President's House, Aiwan-e-Sadr-ah neih a ni dawn a ni.