Kazakhstan sorkarin banna thehlut ; President-in state of emergency a puang

Kazakhstan rama fuel man sang duh lohna lantira mipuiten nawrh an huaihawtnaa buaina nasa tak a chhuah hnuah, prime minister Askar Mamin kaihhruai sorkar chuan nimin khan President Kassym-Jomart Takayev hnenah banna a thehlut. President hian banna thehluh hi a lo pawmsak nghal a ni.

Kazakhstan rama khawpui lian ber, Almaty khuaah Thawhlehni khan mipui lungawi loa pungkhawmte chu police-ten tear gas leh stun grenade hmangin hnawhdarh tumin an kap a, pungkhawmte leh police-te hi rei tak an intibuai zui a ni. Police-te chuan nawrh huaihawt zinga mi 200 chuang an man.

Thawhlehnia buaina nasa tak a chhuah hnuah sorkar chuan banna hi a thehlut nghal a, President chuan a lo pawmsak hnuah Almaty leh an rama oil siamchhuahna, Mangistau province-ah state of emergency a puang zui nghal a ni.

Pathianni aṭang khan Mangistau province-ah fuel man sang duh loin mipuite hian lungawi lohna an lantir ṭan a, hemi hnu hian khawpui dangah pawh lungawi lohna hi lantir chhunzawm a ni ve leh bawk.

President Tokayev chuan sorkarin banna a thehluh hnuah acting cabinet member ruat nghalin, heng mite hnenah hian LPC man khuahkhirh tura hma la nghal turin a hriattir.