WHO-in hri kaite ni 14 khunghran zel la duh

Covid-19 hri kai zinga tam tak chu hri an kai aṭanga ni 5-7 chhungin dam thei mah se, World Health Organisation (WHO) chuan hri kaite hi ni 14 chhung la inkhunghran chhunzawm zel se a duh tih a sawi.

WHO Covid-19 Incident Management Support Team hotu, Abdi Muhamud chuan press mite a kawmnaah hei hi sawiin, ram hrang hrangte chuan hri kaite dinhmun azirin quarantine rei zawng hi an siam a ngai a ni, a ti.

Ram ṭhenkhat, hri kai tlemnaah chuan hri kaite inkhunghran tir rei hian hri darh tur nasa takin a veng thei tih a sawi bawk.

Covid-19 leh influenza chu kai kawp theih a nih thu WHO hotu chuan sawiin, mahse heng hri pahnihten taksaa hna an thawhdan hi a dan avangin hri thar insiamna a tlem a ni,a ti.

WHO Strategic Advisory Group of Experts (SAGE) on Immunization chu January 19 hian inhmukhawmin, khawvel hri leng dinhmunte an thlirho leh dawn a ni. He meeting-a ngaihtuah tur zingah hian booster dose inpek hun te, vaccine chi hran chawlhpawlh leh, vaccine dang siam belh chungchangte pawh a tel.