US-ah nikhat chhungin Covid-19 kai mi mtd khat chuang hmuchhuak

United States-ah Omicron variant hri leng karah Thawhṭanni khan Covid-19 kai thar mi maktaduai khat chuang an hmuchhuak tih Johns Hopkins University data chuan a tarlang.

Kar tawpa result an tihkhawtlai ṭhin avangin hri kai thar hi an pun phah a, nimahsela kar tawp dang zawng aiin a sang zawk a ni. Ramchhungah hri kai thar mi 1,080,211 awmin, khawvel huapa nikhat chhunga an hmuhchhuah tam ber ṭum a ni.

University chuan, ni sarih chhung chawhruala nikhata hri kai zat chu mi 4,86,000 an nih thu mithiamte'n an sawi a ni, an ti.

U.S. pandemic advisor Anthony Fauci chuan ramchhungah Covid-19 kai an pun belh zel a rin thu leh tun aṭanga kar rei lote hnuah a peak an thlen theih a rin thu a sawi.

US-ah December 25 thlenga Covid-19 kai thar zinga 59% te chu Omicron kai an nih thu sorkar thuchhuak chuan a tarlang.

Dr. Fauci chuan South Africa ang khan November thlatawp lamah strain thar an hmuhchhuah hnua a darh hnu rei loteah a reh leh mai avangin, a reh leh thuai ang tih beiseina an neih thu a sawi.

Covid hri lo leng tawh dangte aiin US-ah hian hri vanga thizat leh damdawi-in panpui ngai chu tunhnai khan an tlahniam thung a ni.

Ni sarih liam ta chhung khan hri vanga thi mi 9,382 an awm a, thihpui hi kar tin 10% velin a tlahniam ziah a ni. Kar liam ta chhung vek khan hri kai thar mi maktaduai 3.4 chuang an awm tih Johns Hopkins data chuan a tarlang.

Nikum January 5-11 inkar chhung khan US-ah hian ni tin hri kai thar 2,58,000 an awm thung a ni.

Official te chuan vantlang tana harsatna siam lo tawk leh ram ei bar emaw service pawimawh emaw, dan kengkawh kawngah leh air travel lama buaina thlen lo thei tur ang bera kalpui tumin harsatna lian tak an tawk mek a ni.

Kar liam ta khan, U.S. Centers for Disease Control and Prevention chuan Omicron vanga state ṭhenkhata thawktu lama indaih lohna lian tak an tawh lohnan Covid-19 kai natna langchhuak lote inkhunghran hun chhung chu ni ngaah an tihtawi sak a ni.

U.S. Food and Drug Administration chuan Thawhṭanni khan ramchhunga zirlai naupangte'n school an luh ṭan leh hmain, naupang kum 12 chin hnenah Pfizer siam Covid-19 booster dose semchhuak turin pawmpuina an pe.