India chhulchhuak hmeichhe zinga mahnia South Pole thleng thei hmasa ber Captain Harpreet Chandi

India chhulchhuak British Sikh Army officer leh physiotherapist, kum 32-a upa Captain Harpreet Chandi, a hming lema Polar Preet tiha an koh bawk chuan record thar siamin, India rama hmeichhe zingah mimala kea South Pole kal thleng thei hmasa ber a ni.

Capt. Chandi hian ni 40 chhung kea km 1,127 a thui a kal hnuah a hlawhtlinna hi Thawhṭanni khan ama blog kaltlangin a puang a ni.

"Vur sur karah South Pole ka thleng thei a ni. Ka rilruah thil tam tak a awm a. Kum thum kal ta kha chuan polar chungchang hi engmah hriat ka nei lo a, tuna ka thleng thei hi awih pawh a har hle. Ka tum ram thlen hi a har hle a, min puitute chungah lawmthu ka sawi duh a ni," a ti.

Chandi chuan sawi chhunzawmin, "Ka zinkawng hi ka mimal nun piah lam thil a ni. Mipuite hi an nuam tih chin kal pela inrintawkna nei turin ka fuih duh a ni. Mi pangai anga khawsa turin thu tamtak ka dawng tawh a, mahse kan theihna sang ber lantir turin hma kan lak ve a ngai a ni," tiin Capt. Chandi chuan a sawi.

Chandi hian London khawpuiah a cheng mek a, Queen Mary University aṭangin Sports and Exercise Medicine-ah masters degree a zir mek a, Antarctica lama a kal hma hian a inpuahchahna kawng khat atan tyre lian tak pahnih chu sledge angin a hnuk kual ṭhin a ni.