North Korea-in Liaison Office a bomb chhia

North Korea chuan South Korea nena office inṭawm an neih, North Korea-a Kaesong Industrial Region hmuna Inter-Korean Liaison Office chu Thawhlehni tlai dar 2:50 vel khan a bomb chhia. 

Chhawng li-a sang, he Liaison Office hi kum 2007 khan sak ṭan a ni a, kum 2018 September 14 khan ram pahnihte thawhdunna ṭha zawk an neih theihna atan hawn a ni. Mahse Covid-19 hri leng vangin kumin January thla aṭang khan he hmunah hian office kai an awm tawh lo.

North Korea-in office an tihchhiat chhan ber chu balloon hmanga SKorea-a pawl ṭhenkhatin NKorea sawiselna leh demna lehkha an thawn luh ṭhin vang a ni. Hemi chungchangah hian ram pahnihte hian a hma pawhin inbiakna an lo nei tawh a ni. 

South Korea unification minister Kim Yeon-chul chuan NKorea-in Liason office a bomb chhiat hnuah, ram pahnihte inkar boruak chhiat belh zel chungchangah mawhphurhna lain ban a tum thu a sawi. SKorea chuan an inkar boruak siamṭhatna atana inbiakna nei tura an inhawn reng thu a sawi a, hemi rual hian NKorea thiltih dan chu a demthu a sawi nghal bawk. 

SKorea president Moon Jae-in chuan NKorea thiltih chu sawiselin, awmze nei loa North lam chet dan chu an enliam mai dawn lo tih a sawi.