Venezuela President tihhlum tuma beih a ni

Venezuela President Nicolas Maduro chu kar kalta Inrinni khan an ram khawpui, Caracas-a military event-a thu a sawi laiin drone hmanga beih tum a ni a, mahse vanneihthlak takin he beih tumna hi a pumpelh nia sawi a ni.

President Maduro hian national army anniversary vawi 81 lawmnaa thu a sawi laiin chung lamah puak thei awmna drone pahnih hi an rawn thlawk a, a dinna piah deuhah an puak niin Communications Minister Jorge Rodrigez chuan a sawi. Sipai pasarihin hliam an tuar.

President thusawina bulah drone thlawk hi hmuh a nih veleh a bodyguard te chuan bulletproof shield hmangin Maduro hi an hliah nghal a ni. Maduro chuan amah beih tumnaah hian an ṭhenawm ram Colombia leh US-a pawl ṭhenkhat an inrawlh niin a sawi a, mahse he puhna Colombia sorkar chuan a pha thung a, Venezuela president-in a puhna hi finfiahna engmah a awm lo niin a sawi.

Minister Rodriguez chuan president beih tumtute hi right-wing opposition te niin a puh a, inthlannaah an chak loh hnuah President tihhlum an tumna pawh an hlawhchham leh ta a ni, a ti. Mahse eptu Voluntad Popular Party chuan thu dik lo anih thu sawiin, party youth leader Hasler Inglesias chuan thil thleng chungchang pawh hi engmah an lo hre ve lo niin a sawi a ni.

Hetih lai hian pawl hriat hlawh vak lo, Soldiers in T-shirt chuan social media lamah President Maduro beih tumtute hi an nih thu an sawi a, puak thei dahna drone pahnih hmangin President hi beih an tum a, mahse an tum hmun an thlen hmain sipaiten an kap thla niin an tarlang.

President Maduro leh amah thlawptute chuan eptu pawl, Colombia leh US te chu Venezuela sorkar tihchhiat leh paihthlak tumah an lo puh fo tawh a ni. Nikuma helicopter hmanga Supreme Court beih a nih ṭum pawh khan Maduro chuan amah phiarutute thiltih niin a lo sawi tawh a ni.