Bangladesh-a zirlai nawrh huai-hawtnaah mi 115 in hliam tuar

Bangladesh-a zirlaiten traffic law him leh khauh zawk siam phutin nawrh an huaihawt chhunzawm zel a, Inrinni khan an ram khawpui Dhaka-a nawrh huaihawtnaa buaina chhuakah zirlai 115 ten hliam an tuar.

Dhaka-ah zirlai sang tel pungkhawmte chuan an thil phut nawrna atan hian kawngpui dangin, motor leh driver-te an endik a ni. Hetih lai hian nawrh huaihawtte hi mi ṭhenkhatten an rawn bei let a, a beitute hi hriatchian ni lo mah se zirlaite chuan rorellai party, Awami League nena inzawmna neite niin an sawi.

Zirlaite hian July 29-a Dhaka-a bus chak taka tlanin zirlai pahnih a sut hlum avangin lungawi lohna hi an lantir a, sorkar chu traffic law him leh khauh zawk siam turin an phut a ni. Zirlaite nawrh huaihawtnaa buaina a chhuah vang hian thuneitute chuan Dhaka khawpuiah Inrinni khan darkar 24 chhung atan mobile internet an titawp.