Honduras President-in Covid-19 a kai

Honduras president Juan Orlando Hernandez chuan Thawhlehni zana TV-a thu a sawiah Covid-19 a kai tih a sawi a, a nupui bakah a thawhpui hnai tak pahnih pawhin he hri hi an kai tih a puang. 

President Hernandez chuan kar liam ta khan a damsam loh thu sawiin, sample test sak a nih hnuah Thawhlehni khan hri hi a kai tih hriat chian a ni ta tih a sawi. Enkawlna ṭha taka a dawn thu sawi nghalin, midang nena intlawhpawh loin hna pawh a thawk chhunzawm zel thei dawn tih a sawi. A nupui pawhin he hri hi kai mah se a taksaa natna lang chhuak a nei lo tih a sawi bawk. 

Hri leng laka an himna turin an ram mipuite chu social distancing dan chu zawm ṭha turin Hernandez chuan a chah nghal a, thil ṭul leh pawimawhah chauh kal chhuak  turin a ngen bawk.

 

Honduras-ah hian hri kai hi 9,000 chuang an awm tawh a, mi 322 in an thihpui tawh a ni. Hri leng vang hian thla thum dawn an inkharkhip a, kar liam ta aṭang khan khuahkhirhna ṭhenkhat chu thlahdul ṭan a ni.