Saudi Arabia-in Canada palai hnawtchhuak

Saudia Arabia chuan nimin khan an rama Canada ambassador chu hnawtchhuakin, Canada rama Saudi palai chu a ko haw a, Canada ram nena sumdawnna lam an inzawmna pawh a tihtawp bawk.

Saudi Arabia chuan Canada chu an ram chhung inrelbawlnaa inrawlha puhin hetiang thil hi a ti ta niin a sawi.

Canada foreign ministry chuan kar hmasa khan Saudi Arabia-a human rights activist eng emaw zat man an nih chungchang sawiselin chhuah tura a phut thu a sawi a ni. Man zingah hian Saudi-American women's rights campaigner Samar Badawi pawh a tel. Badawi-i hian Saudi Arabia rama mipa dah chungnun leh, hmeichhiate awpbeh an nihna chu titawp tura a phut thu a lo sawi fo tawh a ni. Saudia Arabia chuan women rights campaigner eng maw zat chu ramdangte thawhpui leh, an ram himna tiderthawng zawnga chea puhin a man a, mahse an zinga ṭhenkhat chu chhuah an ni tawh.

Saudi Arabia foreign ministry chuan an mi mante chungchanga Canada-in thuchhuah a lo siam chuan a tilawm lo hle tih a sawi a, rang taka chhuah nghal tura an phutna ṭawngkam an tarlang tel chu ram pahnihte inkara hman turah an pawm thei lo tih a sawi. Hei vang hian Canada nena insumdawn tawnna leh investment a tihtawp thu leh, Canada palai an hnawhchhuah thu hi sawiin an ram inrelbawlnaa inrawlhna tumna reng reng an pawm theih loh thu an sawi. Canada ambassador hi an ram chhuahsan turin darkar 24 hun an pe a ni.