Indonesia-a lirnghingah mi 82 thi

Indonesia-a Lombok thliarkarah Pathianni khan magnitude 7.0-a nain lir a nghing a, lirnghing avanga chhiatna thlenga thi hi mi 82 an tling tawh a, mi tam takin hliam an tuar bawk. Lombok-ah hian July 29 khan magnitude 6.4-a nain lir a lo nghing tawh bawk a, mi 17 an thi a ni.

Pathianni-a lirnghing hian chenna in tam tak a tichhia a, lirnghing tuartute chhanchhuah leh chhawmdawl hna hi thawh mek a nih thu national disaster management agency thupuangtu Sutopo Purwo Nugroho chuan a sawi.

Nugroho chuan lirnghing vang hian hospital leh health clinic building te a chhiat tel avangin hliam tuarte chu hospital kawtah te enkawl an nih thu a sawi. Lirnghing hi Lombok thiarkara khualzin te tlawh nasat, Utara district, Timur district leh West Nusa Tenggar province khawpui Mataram ten an tuar nasa zual a ni. Hliam tuar leh thi tam zawk hi in chimin a delh te an ni.

Lirnghin hun hi an ram huna zan dar dar 6.46 vel a ni a, a nghin ṭanna hi Lombok Timur district hmarthlang lam km 18 vela hla, lei hnuia km 15 vela thuk a ni. Magnitude 7.0-a naa a nghin hnu hian ṭum 47 zet a nghing nawn (aftershock) leh a ni.

Bali Island leh East Java province-ah pawh lirnghing hi an hria a, thil tihchhiat pawh a nei a ni.