Drone hmanga Venezuela President beih tumtu mi paruk man

Puak thei thil awmna drone hmanga Venezuela President Nicolas Maduro beih tumnaa inhnamhnawiha puh mi paruk chu man an ni tawh.

Kar kalta Inrinni khan President Maduro-an an ram khawpui, Caracas-a military event-a thu a sawi laiin drone pahnih, puak thei thil dah telna hmang hian beih tum a ni. Mahse drone hi president awmna hmun a thlen hmain sipaiten an kap thla a, a puak zui ta nia sawi a ni.

Interior minister Nestor Reverol chuan President thah thuma beihnaa inhnamhnawiha puh mi paruk man an nih thu hi a sawi. President Maduro chuan pawikhawihtute chu na taka hrem an nih tur thu a sawi a, he thilah hian an ṭhenawm Colombia ram bakah US chu inrawlhah a puh bawk. Mahse Colombia chuan Maduro-a puhna hi thu awmze nei lo niin a sawi thung. US National Security Adviser John Bolton pawhin President Maduro beih tumnaah hian US chuan inrawlhna a nei lo niin a sawi bawk.