Italy-in kum 50 chin chunglamte vaccine la vek turin thupek a tichhuak

Italy chuan health lama hnathawk leh hri vanga thihna thleng tihtlem tumin, an ram mipui kum 50 chin chunglamte hnenah Covid vaccine an lak ngei na tur dan thar an tichhuak.

He dan thar hi June 15 thleng awh tura ruahman a ni. Kaih hruaina thar an kalpui anih chuan Italy hi Europe ram zinga kalpui hmasaber tur an ni.

Draft tarlan danin, February thla tir aṭanga March thla tawp thlengin, vaccine dose kima la tawh tih nemnghehna neite emaw tunhnaia hri kai dama puan emaw chauhin public office, non-essential shop, bank, post-office leh hairdresser-ahte kal an phalsak an ni.

Italy-ah hian hri leng thawh hnihna February 2020 hnu hian coronavirus vangin mi 1,38,000 chuang an thi tawh a, Europe ram zingah Britain dawta thihpui tamberna ram a ni.

Prime Minister Mario Draghi kaihhruai sorkar chuan ramchhunga zirtirtu leh health worker-te chu vaccine la vek turin a lo hrilh tawh a, nikum October thla khan hnathawkte chu an hna an ṭan hma ngeiin, vaccine dose kimin an la tawh tih finfiahna emaw negative test result emaw an hmuh a ngai a ni. Result hmun duh lo te chu hlawh la thei loa an hna aṭanga chawlh tir an ni ang a, mahse ban erawh an ni dawn lo thung a ni.

Nilaini khan kum 50 chin chunglamte tana test neih tura tih chu, vaccine lak ngeina tur thupek khauh zawkin an thlak ta a ni. February 15 aṭanga thupek zawm lote chuan euro 600-1,500 thleng an chawi thei a ni.

Right-wing League lama minister chuan kum 50 chin chunglam tana vaccine dan thar an siam chu sawiselin, "zirchianna mumal awm lo leh Covid kai damdawi-ina dahluh tamzawkte chu kum 60 chuangte vek an ni" a ti.

Austria chuan thla thar aṭang khian kum 14 chin chunglamte tan vaccine la vek turin thupek an tichhuak a, hetihlai hian Greece chuan January 16 aṭangin kum 60 chunglamte chu vaccine lak vekna tur dan thar an tichhuak bawk a ni.

Italy hian Europe hmarlam ramte aiin hri inkaichhawn awl tak Omicron variant chu tuar har deuh mahse, tunhnai chho khan hri kai thar, damdawi-in leh intensive care unit-ah mi tamzawk dahluh an ni.

Kar hnih liam ta chhung khan chawhrualin nitin hri vanga thi mi 150 chuang an awm ziah a ni.

Nilaini khan hri kai thar mi 1,89,109 awmin, hripui len hnua Italy rama an hmuhchhuah tamber ni a ni.