UN-in Kazakhstan-ah inkhuahkhirhna kalpui turin ngen

United Nations chuan mipuite'n fuel man sang zel duh lohna lantira Kazakhstan rama tualchhung buaina chhuak chu khapdai tur leh inkhuahkhirhna kalpui turin UN thupuangtu Stephane Dujarric chuan Nilaini khan a sawi.

"Kazakhstan-a tual­chhung mite dinhmun hi kan thlithlai reng a ni. Buaina chhuaka inhnamhnawihte hian tharum thawhna lian zawk a thlen lohnan leh hemi kaihhnawiha boruak muanawm zawk nen inbiakna neih kan ngai pawimawh zawk tur a ni" tiin Stephane Dujarric chuan a sawi.

Dujarric chuan United Nations hian Kazakhstan-ah office leh an hnuaia hnathawkte an neih thu sawiin, tunthlengin UN staff-te chuan vauna an la tawk lo tih a sawi.

Kazakh president Kassym-Jomart Tokayev chuan Nilaini khan an ram boruak sang tak karah a khauh thei ang bera hmalak a rilruk thu a sawi. Nilaini vek khan sorkarin banna an thehluh chu a lo pawmsak tawh a ni.

Kazakhstan-a President chenna halsak
Kazakhstan-a an khawpui lianbera President chenna leh Mayor office te chu Nilaini khan mipui lungawi lo pungkhawmte chuan an halsak.

Police te chuan Almaty-a mipui hnawhdarh tumin tear gas, water cannon leh concussion grenade te an hmang tih an sawi.

Kazakh Interior Ministry chuan police officer pariat leh national guard member ṭhenkhatte chu buaina chhuakah hian an thi a, mi 300 chuangin hliam an tuar bawk a ni. Civil mite zingah thi leh hliam hriat an ni lo thung a ni.

President KassymJomart Tokayev chuan buaina chhuak khuahkhirh tumin, rampumah karhnih chhung state of emergency a puang a ni, an ti.

Kazakh-a buaina chhuak vang hian sorkar dinglai chuan banna an lo thehlut tawh bawk a ni. Netblocks chuan ramchhungah internet chu hman theih lohin a awm thu sawi mahse, Russian news agency Tass chuan nimin zing aṭang khan Almaty-ah internet chu hman theih anih leh tawh tih an sawi.

Tokayev chuan buaina chhuak hi ramdang ṭanpuina hmangin firfiak pawl bultum anih thu sawiin, soviet state hluite chu an rama rorelna tundin anih leh theihnan ṭanpuina a dil nghal a ni. Mipui lungawi lote hian Almatys airport-a airline pangate chu thlawk chhuak thei loin an siam a, deputy mayor chuan a rang thei ang berin mipuite chu an hnawtdarh nghal thu leh, dan pangaiin thlawhna te chu an thlawkchhuak leh thei tawh tih a sawi.