US-in Iran hrekna tur thupek tichhuak

US President Donald Trump chuan Iran hrekna tur thupek chu Thawhlehni khan a tichhuak a, hei hi Iran chuan na takin a sawisel nghal.

Iran leh khawvel ram thiltithei parukten kum 2015-a nuclear deal, Joint Comprehensive Plan of Action tih an siam aṭangin US hi a inhnukdawk a, he inremna siam hi a ṭha tawk loin a huam zau tawk lo niin a sawi. He inremna hnuaiah hian Iran chuan nuclear programme a kalpui chu titawpin, hemi vang hian ram dangte hian Iran an hrekna chu an hlip ang tih a ni.

Iran nuclear deal hi Barack Obama president hun laia siam a ni a, mahse amah thlaktu Donald Trump chuan inremna siam hi a ṭha tawk lo hle tih sawiin a inhnukdawk a, a inhnuhdawh hnuah US chuan Iran hrekna a siam thar leh dawn tih a sawi a ni. Thawhlehni zan aṭang khan Iran hrekna thar hi hman nghal a ni.

US sorkarin Iran hrekna thar tur a tihchhuah thar hian automotive sector bakah rangkachak lama sumdawnna te pawh a nghawng dawn a, Iran chu international trade atana sum hman ber, US dollar a hman khapsak a ni bawk. A thawh hnihna chu November thla hian a tichhuak leh dawn bawk a, hei hian Iran ports leh crude oil export lam a huam dawn a ni. He hrekna hian Iran chauh ni lo, ramdang pawh a nghawng hle rin a ni.