PTI-in Pakistan PM atan Imran Khan nominate

Pakistan Tehreek-e-Insaf (PIT) parliamentary committee chuan Thawhṭanni khan party prime minister candidate atan party hotu, Imran Khan chu official-a nominate an nih thu a puang.

July 25-a Pakistan ram inthlanpui neihah khan kum 65 mi, cricketer aṭanga politician-a inlet, Imran Khan-a party hi party mala seat la hnem ber a ni.

Thawhṭanni khan PTI parlia-mentary committee hi Islamabad-ah an inhmukhawm a, meeting-ah PTI elected member-te bakah party hruaitute an tel a ni. Party vice president Mahmood Qureshi chuan party parliamentary leader atan Khan-a rawtna resolution a pulut a, hei hi member-ten lungrual takin an pawm nghal a ni. Khan chuan amaha rinna an nghah ngam avangin an party member-te chungah lawmthu a sawi.

Pakistan Prime Minister thar lakluh hun tur hi tihchian a la ni lo a, PTI chuan August 11-ah PM thar atan Imran Khan hi lakluh tur niin sawi mah se, report ṭhenkhat chuan an ram Independence Day, August 14-ah lakluh a ni dawn niin an tarlang thung.

Parliament lower house, National Assembly-ah hian seat 342 awmin heng zinga seat 272 chu direct-in mipuiten an thlang a ni. Sorkar siam tur hian member 172 neih a ngai a, PTI hian party malin sorkarna siam pha lo mah se, party tenau zawk leh independent member-te thawhpui a tum a ni.