Bangladesh zirlaite tear gas leh rubber bullet-in kap

Bangladesh police-te chuan Thawhṭanni khan traffic law rintlak leh khauh zawk siam phuta zirlai nawrh huaihawtte hnawh darh nan tear gas leh rubber bullet an hmang. Hetih lai hian human rights group-te chuan sorkar sawisel vanga activist man chu chhuah turin sorkar an phut bawk.

Pathianni khan photographer leh activist lar tak, Shahidul Alam chuan TV-a interview a neihah Prime Minister Sheikh Hasina chu sawiselin, thuneihna a chan theihna atan tharum pawh hmang hreh loah a puh a ni. A thusawi avang hian interview a neih zawh hian police-ten an man nghal a ni. Dhaka court chuan Alam hi thu dik lo thehdarh leh, sorkar dodal zawnga chea puh a nihna chungchanga thu zawhfiah turin ni sarih chhung hreng turin a ti a ni.

Bangladesh-a zirlaite hian bus chak taka tlanin zirlai pahnih a chilhlum avangin lungawi lohna lantirin, sorkar chu traffic law khauh zawk siam tura phutin kar hmasa chhung khan nawrh an lo huaihawt tawh a ni. Khawpui hrang hrangah nawrh hi huaihawt a ni a, Thawhṭanni khan Dhaka-a East West Univerity zirlaite chuan Dhaka University campus kaltlanga kawng zawhin, sorkar laka lungawi lohna leh rorelna dik an phut thute an aupui a ni. Zirlai pungkhawmte hi police-te chuan hnawhdarh tumin tear gas-in an phuh a, rubber bullet te an hmang zui bawk.