N.Korea-in Beijing Olympic-ah tel tum lo
North Korea chuan kumina neih tur Beijing Winter Olympics-ah tel an tum lo tih sawiin, an tel duh lohchhan hi Covid-19 hripui leng mek vang leh an ram hmelmate nena infiamna hmun khata va tel chu him tawk loah an ngai a, United States leh an thawhpuite chuan he infiamna hi a hlawhtlin an hlau takzet tih state media chuan Zirtawpni khan an sawi.
North Korea-a Olympic Committee leh Ministry of Physical Culture and Sports chuan China leh Beijing Olympics organising committee hnenah lehkha thawnin, infiamnaah hian tel tum lo mahse kaltlangpui tho tura an duh thu an thlen tih KCNA news agency chuan a tarlang.
Nikum Tokyo Olympics-ah khan an rama infiammite an tirh luh duh loh avangin North Korea hi International Olympic Committee (IOC) aṭangin 2022 thleng suspend an ni.
"Kan ram infiammite dinhmun chu him tawk loa kan ngaih avang leh tunlaia khawvela huapa hripui leng vangin Olympic-ah hian kan tel thei dawn lo a, mahse kan thawhpui China inpuahchah nasatzia kan hriat avangin Olympic festival hlawhtling leh ropui tak an neih theihnan kan thlawp reng a ni" an ti.
United States leh an thurualpuite hmalakdan chu sawiselin,"Olympic Charter boruak leh China hmai zah lohna leh khawvel huapa tihmualpho tumna a ni" tih an ziak a ni.
NKorea hian nikum December khan White House chuan China-in human rights palzut zawnga hma an lakna chu duh loin, US sorkara official-te chuan kum 2022 Winter Olympics chu boycott an duh tih an lo puang tawh a, hetihlai hian US infiammite chu zalen takin Beijing-ah hian an thlawhluh an phal thung a ni, an ti.
Britain, Australia leh Canada-te pawhin an ram infiammite chu kaltir an tum loh thu an sawi.
"US leh an chhiahhlawh ramte chuan China-in hlawhtling taka Olympic an thlen theih lohnan vervek taka an hmalakna chu a hlawhtling teuh tawh hle a ni" tiin North Korea chuan an lehkha thawnah hian an tarlang a ni.
NKorea chuan hri leng vanga khawvel a buai lai pawh khan General Secretary Xi Jinping kaihhruaina hnuaiah infiamna hi hlawhtling taka buatsaih anih thu an sawi.