Peru-ah 'flurona' vanga thi hmasaber awm

Peru-a Health Ministry chuan Ningani khan an ramah tlang hri leng chi hrang hrang leh Covid-19 inchawhpawlh 'flurona' vangin kum 87-a upa natna dang neisa leh coronavirus vaccine la la lo chu a thi tih an puang.

Flurona vanga thi hi Peru-a Amazonas region hmarchhak lam mi anih thu National Center for Epidemiology, Prevention and Control of Diseases lama an researcher Cesar Munayco chuan a sawi.

Hri kai dangte hi naupang pakhat leh kum 40-a upa Covid-19 vaccine dose kima la tawh a nih thu Munayco chuan a sawi.

Hri kaite hian khuh, hrawk thip leh malaise angin taksaah a rawn lang chhuak a, hri vanga thihna an pumpelh theihnan Covid-19 leh influenza vaccine la vek turin Munayco chuan mipuite a ngen.

"Hri leng hi kan ngaihven a ngai hle a ni, a chhan chu kan ramchhunga Loreto, San Martin, Amazonas leh Ucayali ramhnuaiahte H3N2 influenza chu nasa takin a darh mek a ni" tiin Munayco chuan a sawi.

Peru hian an ramah nikum December thla aṭanga Omicron variant darh vangin Thawhlehni khan Covid-19 hri leng thawhthumna a thleng chho mek tih an puang a, South America ramah hian Omicron kai mi 300 chuang an awm tawh a ni.