Colombia president thar lalut

Colombia President thlan thar Ivan Duque chu Thawhlehni khan rinawmna thu tiamtira lakluh a ni.

Lawyer hlui, President Duque chuan lakluh a nih hnua thu a sawiah, an ram impumkhatna leh economy tihmasawnna tura theihtawp chhuah a tiam. Eirukna do tura ruahmanna thar siam a tiam bawk.

President kalchhuak tur Juan Manuel Santos chuan amah thlaktu Duque hnenah, kum 2016-a an ram tualchhung buaina tihtawp tura inremna an lo siam tawh chu zah a, vawngnung zel turin a ngen. Santos-a president hun lai hian Colombia rama helpawl lian ber, Farc or Revolutionary Armed Forces of Colombia chu inremna an lo siampui tawh a, helpawlte pawh hian an ralthuamte dahin political party angin an awm zui a, Revolutionary Alternative Common Force an inti tawh a ni. Parliament inthlanah pawh khan an member eng emaw zat chu thlan tlin a ni.

Duque chuan Colombia rama remna leh muanna a awmna turin theihtawp chhuah zel a intiam a, hemi rual hian Farc-te chu an member hlui, mihring puite laka pawikhawihna rapthlak tak thlentute chungah nem lutukah a puh thung. Heng mite kut tuartute hian rorelna dik an hmuh theih nan an bei dawn tih a sawi.

June thlaa President thlanna neihah Centro Democrático (Democratic Centre) party candidate Duque hian a khingpui Gustavo Petro hnehin, vote tla aṭangin 54% a hmu a ni. Kum 42 mi Duque hi Colombia president atana thlanchhuah zinga naupang ber a ni. A thawhpui, Marta Lucia Ramirez-i chu Colombia rama hmeichhe zinga vice-president ni thei hmasa ber a ni bawk.