Eiruk thubuaiah Argentina Vice-President hlui an man

Argentina Vice President hlui Amado Boudou chu eiruk thubuaiah kum nga leh thla 10 tang tura hrem a nih hnuin man a ni.

Boudou-a thiam loh chantirna hi pawisa print chhuaktu company lei a tumna nena inkaihhnawih a ni.

Argentina President hlui Critina Fernandez de Kircher-i hnuaiah Boudou hi vice president a ni ṭhin. President hlui pawh hi eiruk thubuaiah hian thu zawhfiah turin koh a ni bawk. Hruaitu hlui pahnihte hian an puhna hi thu dik lo niin an sawi a, President ṭanglai Mauricioa Marci-an tihchhiat a tumna hmanrua mai niin an sawi.

Boudou hi kum 2010, economy minister a nih laia a mimal hamṭhatna hmuh theihna turin currency company Ciccone Calcográfica a tlachhia, bankrupt-a puanna chu sut sakah puh a ni. Buenor Aires court chuan thamna sum tam tham tak la leh, ram hruaitu dinhmun chelh nena inmil lo taka sumdawnna kalpuiah puh a ni. A damchhunga public office luah thei tawh lo tura hrem a ni bawk. Ciccone Calcográfica neitu hlui, Nicolas Ciccone pawh hi kum li leh a chanve tang tura hrem a ni.